ਤਾਜਾ ਖਬਰਾਂ
ਇੰਡੀਅਨ ਪ੍ਰੀਮੀਅਰ ਲੀਗ (IPL) ਦੇ ਮੌਜੂਦਾ ਸੀਜ਼ਨ ਵਿੱਚ ਅੱਜ ਰਾਇਲ ਚੈਲੇਂਜਰਜ਼ ਬੰਗਲੁਰੂ (RCB) ਅਤੇ ਲਖਨਊ ਸੁਪਰ ਜਾਇੰਟਸ (LSG) ਵਿਚਾਲੇ ਜ਼ੋਰਦਾਰ ਮੁਕਾਬਲਾ ਹੋਣ ਜਾ ਰਿਹਾ ਹੈ। ਲਖਨਊ ਦੇ ਘਰੇਲੂ ਮੈਦਾਨ ਏਕਾਨਾ ਸਟੇਡੀਅਮ ਵਿੱਚ ਹੋਣ ਵਾਲਾ ਇਹ ਮੈਚ ਸ਼ਾਮ 7:30 ਵਜੇ ਸ਼ੁਰੂ ਹੋਵੇਗਾ, ਜਦਕਿ ਟਾਸ ਸ਼ਾਮ 7 ਵਜੇ ਕੀਤਾ ਜਾਵੇਗਾ। ਰਜਤ ਪਾਟੀਦਾਰ ਦੀ ਅਗਵਾਈ ਵਾਲੀ ਬੰਗਲੁਰੂ ਟੀਮ ਪਿਛਲੀ ਹਾਰ ਨੂੰ ਭੁਲਾ ਕੇ ਪਲੇਆਫ ਦੀ ਦੌੜ ਵਿੱਚ ਆਪਣੀ ਦਾਅਵੇਦਾਰੀ ਪੱਕੀ ਕਰਨ ਦੇ ਇਰਾਦੇ ਨਾਲ ਮੈਦਾਨ ਵਿੱਚ ਉਤਰੇਗੀ।
ਲਖਨਊ ਸੁਪਰ ਜਾਇੰਟਸ ਲਈ ਇਹ ਮੈਚ ਕਿਸੇ ਅਗਨੀ ਪ੍ਰੀਖਿਆ ਤੋਂ ਘੱਟ ਨਹੀਂ ਹੈ। ਲਗਾਤਾਰ ਛੇ ਮੈਚ ਹਾਰਨ ਤੋਂ ਬਾਅਦ ਅੰਕ ਸੂਚੀ ਵਿੱਚ ਸਭ ਤੋਂ ਹੇਠਲੇ ਪਾਏਦਾਨ 'ਤੇ ਪਹੁੰਚੀ ਰਿਸ਼ਭ ਪੰਤ ਦੀ ਟੀਮ ਲਈ ਇਹ ਮੈਚ ਆਪਣੀ ਸਾਖ ਬਚਾਉਣ ਦਾ ਆਖਰੀ ਮੌਕਾ ਹੋ ਸਕਦਾ ਹੈ। ਦੂਜੇ ਪਾਸੇ, ਬੰਗਲੁਰੂ ਨੇ ਹੁਣ ਤੱਕ ਖੇਡੇ 7 ਮੈਚਾਂ ਵਿੱਚੋਂ 5 ਜਿੱਤ ਕੇ ਆਪਣੀ ਸਥਿਤੀ ਮਜ਼ਬੂਤ ਰੱਖੀ ਹੋਈ ਹੈ। ਇਸ ਸੀਜ਼ਨ ਦੇ ਪਹਿਲੇ ਮੁਕਾਬਲੇ ਵਿੱਚ ਵੀ RCB ਨੇ ਲਖਨਊ ਨੂੰ 5 ਵਿਕਟਾਂ ਨਾਲ ਮਾਤ ਦਿੱਤੀ ਸੀ।
ਏਕਾਨਾ ਸਟੇਡੀਅਮ ਦੀ ਪਿੱਚ ਰਵਾਇਤੀ ਤੌਰ 'ਤੇ ਸਪਿਨ ਗੇਂਦਬਾਜ਼ਾਂ ਲਈ ਮਦਦਗਾਰ ਸਾਬਤ ਹੁੰਦੀ ਰਹੀ ਹੈ। ਅੰਕੜਿਆਂ ਮੁਤਾਬਕ ਇੱਥੇ ਹੁਣ ਤੱਕ ਖੇਡੇ ਗਏ 26 ਮੈਚਾਂ ਵਿੱਚੋਂ 14 ਵਾਰ ਪਿੱਛਾ ਕਰਨ ਵਾਲੀ ਟੀਮ ਨੇ ਜਿੱਤ ਹਾਸਲ ਕੀਤੀ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਬੰਗਲੁਰੂ ਨੇ ਇਸ ਮੈਦਾਨ 'ਤੇ ਲਖਨਊ ਵਿਰੁੱਧ ਆਪਣੇ ਦੋਵੇਂ ਮੈਚ ਜਿੱਤੇ ਹਨ। ਏਕਾਨਾ 'ਤੇ ਸਭ ਤੋਂ ਵੱਡਾ ਸਕੋਰ ਕੇਕੇਆਰ (235 ਦੌੜਾਂ) ਦੇ ਨਾਮ ਹੈ, ਜਦਕਿ ਸਭ ਤੋਂ ਘੱਟ ਸਕੋਰ (108 ਦੌੜਾਂ) ਦਾ ਸ਼ਰਮਨਾਕ ਰਿਕਾਰਡ ਲਖਨਊ ਦੇ ਨਾਮ ਹੈ, ਜੋ ਪਿਛਲੇ ਸਾਲ ਬੰਗਲੁਰੂ ਵਿਰੁੱਧ ਹੀ ਬਣਿਆ ਸੀ।
ਸੰਭਾਵਿਤ ਪਲੇਇੰਗ ਇਲੈਵਨ:
ਰਾਇਲ ਚੈਲੇਂਜਰਜ਼ ਬੰਗਲੌਰ:
ਰਜਤ ਪਾਟੀਦਾਰ (ਕਪਤਾਨ), ਵਿਰਾਟ ਕੋਹਲੀ, ਦੇਵਦੱਤ ਪਾਡੀਕਲ, ਜੈਕਬ ਬੈਥਲ, ਜਿਤੇਸ਼ ਸ਼ਰਮਾ (ਵਿਕਟਕੀਪਰ), ਟਿਮ ਡੇਵਿਡ, ਕਰੁਣਾਲ ਪੰਡਯਾ, ਭੁਵਨੇਸ਼ਵਰ ਕੁਮਾਰ, ਜੋਸ਼ ਹੇਜ਼ਲਵੁੱਡ, ਸੁਯਸ਼ ਸ਼ਰਮਾ, ਰੋਮਾਰੀਓ ਸ਼ੈਫਰਡ।
ਲਖਨਊ ਸੁਪਰ ਜਾਇੰਟਸ:
ਰਿਸ਼ਭ ਪੰਤ (ਕਪਤਾਨ), ਨਿਕੋਲਸ ਪੂਰਨ, ਮਿਸ਼ੇਲ ਮਾਰਸ਼, ਏਡੇਨ ਮਾਰਕਰਾਮ, ਆਯੁਸ਼ ਬਡੋਨੀ, ਮੁਹੰਮਦ ਸ਼ਮੀ, ਮੋਹਸਿਨ ਖਾਨ, ਪ੍ਰਿੰਸ ਯਾਦਵ, ਆਵੇਸ਼ ਖਾਨ, ਸ਼ਾਹਬਾਜ਼ ਅਹਿਮਦ, ਅਬਦੁਲ ਸਮਦ।
ਅੱਜ ਦੇ ਮੁਕਾਬਲੇ ਵਿੱਚ ਨਜ਼ਰਾਂ ਵਿਰਾਟ ਕੋਹਲੀ ਅਤੇ ਰਿਸ਼ਭ ਪੰਤ ਦੇ ਬੱਲੇਬਾਜ਼ੀ ਪ੍ਰਦਰਸ਼ਨ 'ਤੇ ਰਹਿਣਗੀਆਂ। ਕੀ ਲਖਨਊ ਆਪਣੇ ਘਰ 'ਚ ਹਾਰ ਦਾ ਸਿਲਸਿਲਾ ਤੋੜ ਸਕੇਗੀ ਜਾਂ ਬੰਗਲੁਰੂ ਆਪਣੀ ਜਿੱਤ ਦੀ ਲੈਅ ਬਰਕਰਾਰ ਰੱਖੇਗਾ, ਇਹ ਦੇਖਣਾ ਦਿਲਚਸਪ ਹੋਵੇਗਾ।
Get all latest content delivered to your email a few times a month.
